【黐手黐腳污糟邋遢】Porsche 964 RSR 3.8奇蹟累計行駛10km*

Photos: R.M. Sotherby"s保時捷964喺經典跑車巿場嘅易手價屢創新高，無論係投資者或用家都搏晒命去發掘「筍盤」。 5月底，R.M. Sotherby"s將會拍賣一部1993年嘅964型911 RSR 3.8，呢部車由出廠至今，屢計只行咗10km，換言之，極可能係廿幾年冇著過車。


一聽到廿幾年冇著過車，好多車迷都話：「有冇搞錯呀？唔得㗎喇，副偈死梗，啲油路塞晒，生晒銹，乜乜乜……」哈哈！落得bid嘅點會唔知，亦都有晒心理同「銀彈」準備，預咗要攞一大筆為部車翻新。


話時話，呢部Polar Silver車身嘅964 RSR 3.8點解咁污糟？係唔係「劈」埋一二角冇人理風吹雨打嘛？其實係全車車身同輪圈，仍保留出廠時嘅Cosmoline防銹塗層，呢種塗層係有少少「黐笠笠」，日子耐咗，自然會黐住灰塵。








964 RSR 3.8係964型911嘅尾期產品，可以話係後來911 GT3嘅前身，RSR 3.8主要設計畀GT賽事用，但亦有街車版。不過，街車版車廂嘅設備一切從簡，大多數買家亦會「有咁齋得咁齋」，唔會額外添加選配豪華設備。

呢部964 RSR 3.8嘅首任車主剛好相反，全車車廂以Can Can Red（肯肯紅，以肯肯舞為名）為主調，無論係真皮座椅、翻車保護架、地氈、內裝襯飾、賽車式安全帶、都清一色係肯肯紅，儀錶台與毗鄰組件則屬銀灰色塑料及真皮。咁特別嘅配搭，一睇就知當年呢張「柯打」係特別訂製（tailor-made），畀多唔少錢係不在話下。




964 RSR 3.8總產量只有51部，配911 Turbo車身，引擎為M64/04 RSR 3.8公升水平對向六汽缸自然吸氣引擎，乾式油池設計，5前速手動波箱，廠方最大馬力數字350匹，峰值扭力39.3kgm。但曾有汽車傳媒以馬力機測試RSR 3.8道路版，最大馬力可達375匹，0至96km/h加速只需3.7秒。








賽車版964 RSR 3.8曾經贏得比利時斯帕（Spa）24小時賽總冠軍、日本鈴鹿（Suzuka）1000km耐力賽冠軍及巴西Interlagos 24小時賽冠軍，亦喺美國地通拿（Daytona）24小時賽取得組別冠軍。R.M. Sotherby"s未有公布拍賣底價，亦冇預測成交價……肯定巧貴

喜歡這篇嗎？快分享吧！

前一頁 後一頁