【15分鐘食飽80%】Porsche 600匹電動車多Specs任揀*

Photos: Porsche Presse保時捷（Porsche）喺2015年公布Mission E概念車，好快落實投產，最快2019年下半年公布接近巿販投產嘅原型車，2020年初正式發售。 近月，保時捷主席Oliver Blume接受多間歐美傳媒訪問，以「唧牙膏式」透露有關Mission E投產版嘅具體資料。
Mission E喺2015年法蘭克福車展發表當日，德國總理默克爾（圖中）親身撐場
Mission E可以喺15分鐘充滿電池總容量嘅80%，足以連續行駛約400km。喺完全充滿電情況下，可以連續行駛約500km。不過，想「15分鐘餵飽八成」，必定要有保時捷特製嘅800V專用充電機，據聞保時捷會參照Tesla做法，喺城巿內人多地點及高速公路休息站，設置呢款充電機。






仲有，Mission E日後唔只一個specs，買家可以根據自己需要同預算，揀算最合適嘅電池續航同馬力輸出配搭，正吖，唔係個個買家都想揀頂級specs嘅。Oliver Blume喺接受英國傳媒訪問時有提及，日後可以透過網上更新升級，增大最大馬力輸出咦！咁有趣？例如你而家只有400匹，可以透過網上更新，將最大馬力增至450匹。 喂！有「隱藏技」，即係有得破解啦！入定啲花生唔慳得。

Mission E雖然比Tesla Model S P100D嘅0至100km/h加速時間慢1秒，要3.5秒，但係掛住保時捷牌頭同光環，始終有佢價值，再講，3.5秒已經好快，2.5秒嘅起跑時間雖然係好巴閉，但真係唔值得咁High咁亢奮囉。 Mission E嘅測試原型車即將進入路面實測階段，記得睇實啲新車諜照網站喇。

喜歡這篇嗎？快分享吧！

前一頁 後一頁