【3球買部舊Audi】Audi Sport Quattro珍系要咁貴*

Photos: RM Sotheby"s1985年發表嘅奧迪（Audi）Sport Quattro，限量生產約200部，誕生嘅原因，完全係為符合參加世界越野錦標賽（WRC）B組賽事嘅要求，亦即係所謂型號認證（Homologation）。

Audi Sport Quattro比起80年發表嘅Audi Quattro Coupe短咗一大截，原因係短啲嘅軸距令部車跑彎更靈活，以應對急速冒起嘅Peugeot 205 T16等對手。




不過，軸距縮短咗，後座腳位形同虛設，除非你慣咗盤膝而坐，否則真係零腳位。講真，當年買得呢款車嘅車主，大家都心知肚明，一係就好撐Audi Quattro，一係就聞到有得炒，搏將來有得升。


Audi Sport Quattro只有左軚，聞說廠方最後只賣出164部，其餘下場係點，冇統一說法。原裝車配2.1公升直五汽缸雙頂凸輪軸20活瓣引擎，最大馬力306匹，五前速手動波箱，賽車版閒閒哋都有480匹。





呢部白色Sport Quattro將於本月底喺歐洲拍賣，拍賣行預計成交價介乎30萬至35萬歐元，即約256萬至300萬港元。

呢部車出廠後一年多，曾經返抵Audi總廠更換引擎中缸，事緣原裝嘅鋁合金中缸因為抵受唔住強大增壓力而有裂紋，廠方為止更換咗傳統鐵鑄中缸。32年車，累計行咗90000公里，算係「低咪」。




另外，前任車主喺2010年，將部車送去奧迪改裝專家MTM Mayer大修同更換零件，當時上過馬力機，最大馬力達348匹，峰值扭力35.5kgm，咦！比原裝車仲多咗啲喎。

喜歡這篇嗎？快分享吧！

前一頁 後一頁