向「意大利惡魔」致敬 Death Machine 「Airforce」Moto Guzzi*

著名意大利電單車品牌「Moto Guzzi」係由三位一戰時嘅意大利空軍機師及技工共同創立，但其中之一嘅機師兼電單車手，外號「意大利惡魔」嘅Giovanni Ravelli喺大戰後幾日就因飛機意外逝世，無緣見證品牌誕生，只能以Logo上嘅飛鷹作為紀念。而喺早前(1月14日)Giovanni嘅131歲冥壽，來自英國嘅電單車改裝品牌「Death Machine」就發表咗一台由1982年Moto Guzzi LeMans Mk2改裝而成嘅「Airforce」作為紀念。





呢部LeMans MK2係於意大利南部被發現，當時被丟棄於路邊飽經風霜，但運到返英國Death Machine工場檢驗過之後就發現引擎狀態非常良好，只係需要簡單嘅維修。為咗加入航天元素，Death Machine幾乎只保留車架及前叉，其餘部份都係全新人手打造，其中把手及反手掣動更加係特別設計。全車啡鈴以鋁包木製作，而且刻意留下焊點、鎚痕，以模仿一戰時期嘅造功。另外值得一提嘅係「車匙」係一個1/4吋嘅結他插頭——佢哋都知Giovanni根本冇見過電結他，但就深信如果佢仲在生，就一定會鍾意搖滾樂，於是有此一著。









Death Machine用咗112日時間完成「Airforce」，並趕及於上年5月嘅Bike Shed London 2017中展出。但後來佢哋又覺得未夠完美，於是又再修改，直到早前先正式公佈。至於點解佢哋要咁追求完美？事關Giovanni講過一句「Meek will not be remembered(溫馴的不會被記住)」。Death Machine of London

喜歡這篇嗎？快分享吧！

前一頁 後一頁